Warsidaha Puntland

Tirsi 92         

Khamiis 17/05/2001 

    WARARKA MADAXTOOYADA

1.        MADAXWEYNAHA DAWLAD GOBOLEEKDKA PUNTLAND OO FURAY XARUNTA CUSUB EE DIAKONIA

Talaado 15/05/2001. WARSIDAHA-GAROWE.

Madaxweynaha Dawlad Goboleedka Puntland Md. Cabdullaahi Yuusuf Axmed; ayaa saacaddu markay ahayd 5:30 Galabnimo xariga ka jaray Xarun cusub oo ay dhisatay hay’adda Diakonia, xaruntaasi waxay galbeed ka xigtaa xaruntii hore ee Wasaaraddii Gaadiidka ee G/Nugaal, waxay ku fadhidaa dhul aad u ballaaran, wuxuuna dhismaha cusubi ka kooban yahay 12 Xafiis, 2 barxadood oo waaweyn iyo mundul weyn.

Madaxweynaha Dawlad Goboleedka Puntland oo khudbad aad u ballaaran halkaas ka soo jeediyey wuxuu ugu horayn salaan u soo jeediyey dadweynihii ka soo qayb galay iyo marti sharaftii kaleba. Madaxweynuhu wuxuu amaan ballaaran u soo jeediyey hay’adda Diakonia, wuxuuna ku amaanay waxqabadka aan hagrashadda lahayn ee Goboladaan Puntland ka qabatay. Wuxuuna yiri 7 sanno ay wadanka joogtay waxay qabatay wax aan la koobi karin, waxay dhistay Xarumaha Agoonta, waxay wax ka qabatay Xafiisyada Dawlada, Saldhigyada Booliska iyadoo waliba qalabaysay.

Waxaan hay’adda Diakonia iyo hay’adda Swedishka ah ee taageerta Diakonia ka codsaday inay sii wadaan samafalka ay u qabtaan ummadda Puntland.

Madaxweynuhu wuxuu kaloo ammaan u soo jeediyey Enjineerkii dhisay, naqshaddana lahaa Eng. Cabaas Siciid Jibriil iyo Shirkadda JIBCOM ee dhistay xarunta Cusub ee Diakonia.

Madaxweynuhu wuxuu ku soo wareegay qaybaha xarunta cusubi ka kooban tahay. 

Madaxweynaha ka hor waxaa hadalo warbixin ah ka soo jeediyey Madaxa Hay’adda  Diakonia  ee Afrikada Bari, Mr.Urban S Jostrom iyo Ms.Eva oo iyadu ku hadlaysay magaca Hay’adda Swedeshka ah ee taageerta Diakonia. Xafladda furitaanka oo ahayd mid aad iyo aad loo soo Agaasimay,waxaa heeso iyo Ciyaaraha Dhaqanka ku soo bandhigay Kooxda Hiddaha iyo Dhaqanka ee Gobolka Nugaal.

Waxaa iyana buraabur aad u qiimo badnaa oo ay kaga hadlaysay waxqabadkii Diakonia ka soo jeedisay Xafladaas Xildhibaan Jookha Geelle.

Xafladdas waxaa ka soo qayb galay Wasiirka Arrimaha Gudaha iyo Amniga Md. C/qaadir Islaan Maxamed,Wasiirka Arrimaha Bulshada Md.Faarax Warsame Cismaan,Islaan Maxamed Islaan Muuse,Suldaan Siciid Maxamed Garaase,Suldaan C/laahi Xaaji Nuur,Xildhibaanno,Agaasimeyaal Guud,Guddomiyaha Gobolka Nugaal C/laahi Xasan Faarax iyo Duqa Magaalada Daahir Cali Ciise.Marti Sharaf iyo Dadweyne aad u fara badnaa,Waxaana gunaanaday oo duceeyay Suldaan Siciid Maxamed Garaase…

2.            MADAXWEYNAHA DGPL OO FURAY LABA MASHRUUC CAAFIMAAD

Madaxweynaha DGPL Md. C/laahi Yuusuf Axmed ayaa subaxnimadii Talaadada ka Furay Isbitaalka Guud ee G. Nugaal laba Mashruuc oo Caafimaad oo ku kala saabsan Talaalka Caruurta ee lixda Cudur ee dilaaga ah iyo Mashruuca Daryeelka Qoyska.

Xafladdii Furitaanka labadasi Mashruuc oo ay ka soo qayb galeen  Wasiirka Arrimaha Bulshada Dr. Faarax Warsame Cusmaan, Wasiir- ku- Xigeenka Wassaaradda Arrimaha Bulshada ENG.Maxamed Cabdi Kulmiye Agaasimaha Waaxda Caafimaadka ee Wasaaradda Arrimaha Bulshada Dr.  C/ramaan Siciid Max'ud (Dhegoweyne), Hay'adda Care International oo Gacanta ku haysa Mashruuca Daryeelka Qoyska, Hay'adda Federeeshinka oo gacanta ku haysa Isbitaalka muddooyinkaana waday tababarro Caafimaad oo ay siinaysay Madax qaybyada Isbitaalka iyo MCHyada, Unicef oo bixinaysa Tallaalka Carruurta ayaa waxaa warbixinno ku saabsan labadaasi Mashruuc iyo faa'iidooyinka ay bulshada u leeyihiin ka bixiyay Wasiirka Arrimaha Bulshada, Agaasimaha guud ee Caafimaadka ,madaxa barnaamijka Daryeelka Qoyska. 

Madaxweynaha DGPL Md. C/laahi Yuusuf Axmed ayaa ugu dambeyntii ka mahad celiyay howshaas ballaaran iyo intii gacanta ka gaysatay, bulshadana wuxuu u rajeeyey inay ka faa'iidaystaan. Ka dib Madaxweynuhu wuxuu kormeer gaaban ku soo maray qaybaha isbitaalka waxaana uga warbixinayay Agaasimaha Isbitaalka Dr. Max'ed Xasan Carabey.

Qoraal ka soo baxay shirkii Golaha Wasiirada DGPL ee 29/04/2001 ayaa waxaa uu qorayay afar xubnood oo ay dawlad goboleedku u magacawday inay Puntland uga wakiil yihiin ururka SRRC ee dhowaan lagu soo dhisay Dalka Itoobiya iyo weliba inay gacan ka geystaan dhismaha Dawlad Goboleedka Koonfur-Galbeed ee Soomaaliya. 

Qoraalkaas oo soo baxa 12/05/2001 uuna ku saxiixnaa Madaxweynaha DGPL Md. C/laahi Yuusuf Axmed kuna Socday Afarta Xubnood ee Guddigaas ayaa u qornaa sidan:-

Uj:- Magacaabid Guddi.

Shirkii  Golaha Wasiiradda ee 29/04/2001, wuxuu magacaabay xubno ka mid noqda Golaha SRRC, waxay xubnahaas kala yihiin:-

1.                 1.                 Sarreeye Guuto, Cismaan Max'ed Samatar          (Cismaan Fatiig).

2.                 2.                 Axmed Xasan Bile.

3.                 3.                 Cawad Axmed Casharo.

4.                 4.                 C/qaadir Axmed Ceegaag. 

Isla Giddigaasi iyo Max'ed Abshir Walde ayaa hawsha Dhismaha Dawlad Goboleedka Koonfur - Galbeed ee Soomaaliya gacan ka geysanaya iyagoo matalaya Dawlad Goboleedka Puntland.

Guul Eebbe iyo Hawlgal wacan 

Cabdullahi Yuusuf Axmed.

Madaxweymaha Dawladda.

4.         HABKA SHAQA QORISTA       SHAQAALAHA EE D.G.P/LAND OO XEER MADAXWEYNE KU SOO BAXAY

Madaxwenaha Dawlad Goboleedka Puntla-nd,Mudane,C/laahi Yuusuf Axmed,ayaa Taariikhdii 08/05/2001, Garowe ka soo saaray Xeer Lam.225, wuxuu xeeriyay in la dhaqan galiyo qodobada hoos ku qoran:- 

1.     1.     Waxaa reeban in la qoro shaqaale aan soo marin          habka shaqo qorista ee ku qeexan sharciga      shaqada iyo shaqaalaha.

2.     2.     Shaqaalaha waxaa lagu ruqsayn karaa, bedeli     karaa, wareejin karaa, dallacsiin karaa, isla    markaana go;aan Guddiga Anshax marinta, abaal marinta iyo dallacaadaha, isla markaana ka diiwaan gashan Agaasinka Guud ee Shaqada iyo Shaqaalaha, ama Dikreeto Madaxweyne. 

3.     3.     Waxaa reeban guud ahaan in adeegga Wasaaradaha iyo Hay’adaha Dawladda loo isticmaalo mushaar joogta ah, haddayna imaan duruufo kooban oo ku meel gaar ah. 

4.     4.     Mushaharka shaqaalaha lama wareejin karo, iyadoo aaysan isla meel dhigin ha’adaha ku shaqada leh.

5.         MADAXWEYNE-KU-XIGEENKA DGPL OO KA QAYB-GALAY XAFLAD XIL-WAREEJIN AH OO KA DHACDAY XARUNTA NESHA.

Sabti, 12/05/01-da…  WARSIDAHA… Garowe…

Madaxweyne-ku-xigeenka Dawlad Goboleedka Puntland Md, Maxamed Cabdi Xaashi, ayaa taariikhdii 12/05/01-da, ka qayb galay xaflad xil-wareejin ah oo lagu qabtay qolka shirarka ee Hay’adda NESHA, xafladaas oo xilka lagu wareejinayey Agaasimaha Guud ee Hay’adda Duulista iyo Diyaaradaha Rayidka (Civil Aviation), uuna ku wareejiyey Ku-simaha Wasiirka Hawlaha Guud iyo Gaadiidka Md, Maxamed Xaaji Aadan, maadaama ay noqotay hay’ad madax-bannaan oo hoos timaada Madaxtooyada DGPL, taasoo horey uga tirsanaan jirtay Wasaaradda Hawlaha Guud iyo Gaadiidka. 

Waxaa xafladda lagu furay aayado qur’aan ah oo uu jeediyey Md, Cismaan Cali, waxaa hadalkii qaatay Ku-simaha Wasiirka Hawlaha Guud iyo Gaadiidka Md, Maxamed Xaaji Aadan, wuxuuna hadalkii ku bilaabay : 

Madaxweyne-ku-xigeen, Wasiiradda, Marti sharafta kale ee nagala soo qayb-gashay xafladdan oo ah mid lagu kala wareegayo, laguna wareejinayo Agaasimaha Guud ee Hay’adda Duulista iyo Diyaaradaha Rayidka Duuliye Sare Md, Axmed Xaaji Cilmi Cabdulle (Xaaji Dhagax), oo ah nin aqoon u leh ahaan jireyna Duuliyayaashii diyaaradaha xilliyadii ay dawladdu jirtay, waxaana loogu doortay waa nin aqoon u leh waxaana la doonayaa in la habeeyo maamulka duulista hawada ee DGPL, taasoo noqotay mid lagama maarmaan ah in ay ka howl gasho isla markaana ay koontaroosho in ay la xisaabtanto waxna ka qaban karto dayactirka iyo qawaaniinta u degsan in laga dhigo Agaasin Madax-bannaan oo hoos taga Madaxtooyada DGPL,waxaan u rajaynayaa in xilka cusub uu Illaahay u fududeeyo. 

Waxaa kale oo jirtay in Shirkadda DAALO AIRLINES ay geystay xadgudub, isla markaana la ganaaxay lacag dhan $20,000 (labaatan kun oo Dollar), warqadihii waxaa lagu wareejiyey Agaasimaha Guud ee Hay’adda Duulista iyo Diyaaradaha Rayidka (Civil Aviation), waayo waxay samaysay ku xadgudub u degsan xagga sharciga,taa oo khaladaadkeedu badan yihiin….In Kooxda Carta ay magacowday guddi cusub mana qaadan karno, mana aqbalayno, waayo Soomaalidu waxay ku maah-maahdaa ( Hal xaaraan ah Nirig Xalaal ah ma Dhasho) diyaarada soo qaada in aysan ka soo  degi karin xuduudaha Dawlad Goboleedka Puntland soona qaadin karin ciddii soo qaada in tallaabo sharciga waafaqsan laga qaadayo…...

Waxaa hadalkii qaatay Madaxweyne-ku-xigeenka Dawlad Goboleedka Puntland, Md, Maxamed Cabdi Xaashi, oo halkaas ka soo jeediyey khudbad uu kaga warbixinayo heerka ay marayso Hay’adda  cusub oo la doonayo in la sii hormariyo oo ay noqoto hay’ad madax-bannaan waana talo wanaagsan.

Madaxweyne-ku-xigeenku wuxuu kaloo ka hadlay xaalada maanta ay marayso Soomaaliya wuxuuna taataabtay gardarada cad ee waayadan Maamulka M.I.Cigaal uu ka wado Gobolada Puntland qaarkood, taasoo uu ku sheegay afti-ku-sheeg in laga qaadayo Gobolada Sool, Sanaag iyo Degmada Buuhoodle, kuwaasoo ku abtirsada Puntland.

Somaliland oo horey u sheegatay in ay Soomaaliya ka go’aday, dadka ku dhaqan goboladana oo aan doonayn in Soomaali kala googo’do na looma keeni karo oo afti-ku-sheega Hargeysa haku buuxiyaan, dadka Sool, Sanaag iyo Degmada Buuhoodle in ay ka go’aan walaalahood dooni maayaan, waayo Togdheer ma ogola in ay Soomaali kala go’do, Awdal-na lagama oggola, caalamkuna

Eeg bogga 5-aad

Ka yimi bogga 4-aad

ma oggola in Soomaaliya la kala googooyo ee Xabbad iyo xoog waxba lagu qaadi maayo caqligu ha taliyo.

Intaas ka dib, waxaa hadalkii qaatay Agaasimaah cusub ee Hay’adda Duulista iyo Diyaaradaha Rayidka Duuliye Sare, Axmed Xaaji Cilmi Cabdulle, isagoo codsaday in ay gacan ku siiyaan siduu u gudan lahaa mas’uuliyadda la saaray, wuxuu kaloo ka hadlay in Garoomada Muqdisho iyo Hargeysa laga kala dhaxlay gumaystayaashii Talyaaniga iyo Ingiriiska, kan Puntland-na uu yahay mid cusub oo aan laga dhaxlin gumaystayaashii dalka ka talin jirey, mudda aan ku dhamaystiri doono waxay noqonaysaa 100-maalmood (Boqol maalmood), haddii Alle idmo, annagoo ku kalsoon aqoontayada iyo waayo-aragnimadayada taasoo aan u leeyahay aqoontayda. 

Intaa ka dib, waxaa la isweydaarsaday oo lagu kala saxiixday Document-gii ay lahayd Hay’adda Duulista iyo Diyaaradaha Rayidka (Civil Aviation).

Munaasabadaas waxaa goob joog ka ahaa Wasiirka Iskaashiga Caalamiga iyo Qorshaynta Md, Maxamed Xasan Nuur, Wasiirka Ganacsiga iyo Warshadaha, Md, Axmed Cabdi Maxamuud (Xaabsade), Agaasimaha

Guud ee Shaqada iyo Shaqaalaha Duuliye Sare Md, C/laahi Axmed Cabdulle (As-Hari), Wakiilka Hay’adda UNDP Miss Pat Johnson iyo dadweyne aad u faro badan oo xafladdaas lagu marti qaaday.

6.                         MADAXWEYNE-KU-XIGEENKA DGPL OO FURAY TABABAR SAXAAFADEED.

Isniin, 14/05/01-da… WARSIDAHA… Garowe…

Madaxweyne-ku-xigeenka Dawlad Goboleedka Puntland, Md, Maxamed Cabdi Xaashi, ayaa 9:00 subaxnimo hoolka Shirarka ee NESHA ka furay Siminaar lagu baranayo Saxaafadda, soconayana muddo 10-cisho ah.

Madaxweyn-ku-xigeenka oo ka hadlay ahmiyadda saxaafaddu u leedahay bulshada wuxuu yiri :

Suxufigu waa qaali, waa inuu ahaado ninka suxufiga ah xilkas uusan ahaan nin saxaafadda ceebeeya, saxaafadduna waxay ka mid tahay meelaha aqoonta laga helo.

Waxaa jira Wargeysyo ka soo baxa Boosaaso oo aan run ku hadlin ama aan qorin haddii aynu soo qaadano Wargayska la yiraahdo AL-WADAN, oo caddadyadiisii ugu dambeeyey mid ka mid ah ku qoray waxaan sal iyo baar toona lahayn, wuxuuna qoray “Gobolka Bari wuxuu samaystay Maamul, isaga u gaar ah Dawlad Goboleedka Puntland waa ka goostay”, haddaba, kaas oo kale wuxuu waajib u leeyahay in la mariyo ayaa habboon. 

Waxaan Aniga naf ahaantay la xiriiray Madaxa Laanta Afka-Soomaaliga ee BBC-da Yuusuf Garaad Cumar, waxaana u sheegay in mudaharaadyo laga dhigay Gobolada Sool, Sanaag iyo Degmada Buuhoodle arrintaasi in ay jirto wallow aan kaftanay wuxuu yiri “ Aniga ayaa doonaya haddii uu galabtaa bixi waayo warkaas, habbeenimadii ayaa sii daynayaa”, labadaasna midkood kuma bixin, wuxuu yiri “Intuu nin xafiiska joogay telefoon u soo diray mudaharaadkii wuxuu ahaa mid wajiyo badan oo qaar baa lahaa Carta ha dhacdo, qaarna meel buuq ah ka hadlayey”. 

Si kastaba, arrintu ah ahaatee waxaan ku boorinayaa in aad tababarkaan ka faa’iidaysataan, tababarkuna uu najaxo.

 Madaxweyne-ku-xigeenka ka hor waxaa shirkaa lagu furay aayado qur’aan ah iyo wacdi uu soo jeediyey Axmed Maxamed Cali (Kismaayo) oo ka mid ah Suxufiyiinta tababarku u furmay, waxaa ka dib, hadalkii qaatay oo warbixin dheer ka soo jeediyey Yoonis Cali Nuur oo ka tirsan Idaacadda BBC-da Laanta Af-ka Sooomaaliga oo isagu ka mid ah ragga tababarada bixinaya.

Waxaa isna ka mid ahaa raggii ka hadlay siminaarkaas Wakiila EU-da u fadhiya Puntland….

WARARKA GOBOLLADA…..

(SHIR LAGU QABTAY XARUNTA GOBOLKA SANAAG BARI)

Isniin, 14/05/01-da.. WARSIDAHA… Sanaag Bari.[

Waxaa ka dhacay 14/05/01-da fagaaraha weyn ee ku yaal Magaalada Badhan ee Xarunta Gobolka Sanaag shir balaadhan oo ay ka soo qayb galeen dhammaan Madaxda Dawladda Heer Gobol iyo Heer Degmo iyo dhammaan qaybaha kala duwan ee bulshada.

Shirkaasi wuxuu furmay saacadu markay ahayd 8:00 subaxnimo, wuxuuna soconayey ilaa 12:30-kii duhurnimo, ugu horeyntii waxaa shirkaas furay oo khudbad dheer ka soo jeediyey Guddoomiyaha Gobolka Sanaag Md, Maxamuud Siciid Nuur (Dabayl), wuxuuna dadweynaha hordhigay oo u taataabtay waxyaabaha ka jira maanta Soomaaliya gaar ahaan siyaasaddaha Gobolada Puntland iyo Kooxaha Cigaal iyo Carta oo doonaya in burburkii majority ahaan goboladeenu ka badbaadeen in ay soo gaarsiiyaan.

Guddoomiyuhu wuxuu kaloo ku nuuxnuuxsaday in sare loo qaado himilada siyaasada, dhaqaalaha lana xoojiyo nabadgalyada iyo difaaca dalka, iyadoo la iska ilaalinayo dadka yar ee had iyo jeer u taagan khal-khal gelinta.

Waxaa kale oo khubaddo dhaadheer ka soo jeediyey Guddoomiyaha Golaha Odayaasha Gobolka Sanaag

Salaax Garaad Cali Shire iyo Nabadoon Xasan Cali Xasan iyo Xubno kale, waxayna si toos ah u dhaleeceeyeen iyagoo ku hadlaya magaca mujtamaca Puntland kaga imaanaya Gobolada kale ee dalka ee dadka khal-khalka wadaa isku urursadaan.

 Shirkaas oo hadaladiisu u badnaayeen oo maamulka iyo dadweynuhu ka hadlaayeen wuxuu ku dhammaaday guul iyo israac, iyadoo cambaarayn looga soo jeediyey Afti-ku-sheega Maamulka Hargeysa ee Cigaal, waxaana la go’aansaday in dadkan Gobolka Sanaag deggani aanay marnaba bedelayn isirkooda, aragtidooda iyo siyaasadooda.

Sidoo kale wararka naga soo gaaraya Gobolka Sanaag, Guddoomiyaha Gobolka Sanaag Md. Maxamuud Siciid Nuur (Dabayl) wuxuu isla 13/05/200, ku la yeeshay Guddiga Magaalada Badhan ee Xarunta Gobolka Sanaag kana kooban 36-Xubnood oo ah beelaha degen Badhan, Guddigaasi wuxuu isugu jiraa Nabadoono, Aqoonyahano, Culumaa’udiin iyo waxgarad, waxayna howshoodu tahay xiriirinta Dawladda iyo Dadweynaha, waxayna ka hortagaan wixii carqalad abuur ah oo dhan.

Guddigaasi waxay leeyihiin xafiis si toos ah u shaqeeya maalin walba, haddaba kulanka Guddoomiyaha iyo Guddigu ku yeesheen xafiiska Golaha Oday-aasha Gobolka Sanaag, ayaa Guddoomiyuhu ugu xog waramay xaaladda siyaasadeed, dhaqaalaha iyo nabadgalayada Puntland, gaar ahaan tan Gobolka Sanaag ee uu maanta ku sugan yahay. 

Guddomiyuhu wuxuu isla maalintaas kulan kula yeeshay xafiiskiisa madaxda Dawladda heer Gobol iyo heer Degmo oo kala ahaa madaxda laamaha Dawladda iyo Saraakiisha Ciidammada Daraawiishta, wuxuuna kala hadlay xaaladda siyaasaddeed ee Gobolka Sanaag iyo Afti-ku-Sheega Maamulka Cigaal. 

Wuxuu ku booriyay difaaca Dalka, Diinta iyo Dadkaba in ay ka hortagaan kuwa damaca waalay ee u soo hanqal taagaya Dhulkooda, Adkeeyaana Nabadgalyada iyo sugidda amniga heeganna u ahaadaan xaaladda maanta ka jirta dhulka Puntland.

BURCADDII DHACDAY LACAGTII WASAARADDA MAALIYADDA OO GACANTA LAGU DHIGAY

Talaaddo 15/05/2001… WARSIDAHA… Garowe

Taliye xigeenka Ciidanka Booliska ee Gobolka Nugaal, Gaashaanle dhexe Siciid Warsame Jaamac, ayaa WARSIDAHA u sheegay in Burcadii dhacday lacagtii Wasaaradda Maaliyadda gacanta lagu dhigay dhammaantood, tiradooduna ahayd 5-qof. Isla maalintii falkaasi dhacay ee taariikhdu ahayd 10/05/2001, waxaa gacanta lagu dhigay 3-ka mid ahaa burcadii, iyadoo labada kalana la qabtay taariikhdu markay ahayd 14/05/2001, waxaana dhamaantood qabtay Ciidan ka tirsan Saldhiga Degmada Garowe, Saldhiga Degmada Buurtinle iyo Ciidanka Birmadka Booliska ee Gobolka Nugaal.Lacagta ladhacay oo ahayd labo qaybood waxay dhammayd 4,832,950, Sh.So oo ay lahayd Dawladda iyo 800,000 Sh.So oo dadweyne lahaa, waxaana loosoo waday Magaalada Garowe, iyadoo laga soo qaaday Degmada Buurtinle waxaana lacagtaas lagu dhacay oo falkaasi ka dhacay Buundadda jidka laamiga ee saddex- Qolay ee Waqooyi Bari ka xigta Degmada Buurtinle. Burcadaasi waxay dhaawac qaarkood halis yahay u gaysteen Afar Qof oo saddex Rag yihiin midna Gabar tahay iyo baabuurkii lagu waday lacagta oo ay khasaaro u geysteen. Burcada lacagta dhacday oo saddexdii horey loo qabtay ay hadda ku jiraan Xabsiga Gobolka Nugaal, labada kalana ay hadda ku xiran yihiin Saldhiga Booliska Garowe, dhawaana lasoo taagi doono Maxkamada waxaana magacyadooda la kala yiraahdaa:- 

1.            Cali Siciiid Maxamuud C/lle ( Cali Mahdi) oo da’diisu tahay 22 jir.

2.    C/qaadir Maxamed Cali    oo da’diisu tahay 23 jir

3.     C/waaxid Maxmuud Cali Cabdi oo da’diisu tahay 27 jir

4.            Ibraahim Yuusuf Muuse oo da’diisu tahay 25 jir

5.   Axmed Ibraahim Cali Dheeg oo darawalkooda ahaa.

Dhammaantood waxaa laga soo qabtay nawaaxiga Degmada Buurtinle.

SIDA AY ANIGA ILA TAHAY

“PUNTLAND WAA DAL SI WALBA ISKU FILAN”

( Cinwaankaan hoostiisa wixii lagu qoraa waa Ra’yi shakhsi ah oo gaar u ah qofka qoray, WARSIDUHU hala qabo ama yaanu la qabine)… waxaa qoray Ing. Mursal Axmed Nuur.

Kadib markii aan ka waramay xaqiiqada hungada Xamar ee ay isku magac-aabeen Dawlad Somaliyeed Xulufada C/qaasim oo ku dhisan qabiil, waxay illa tahay. 

1.      In aynu dhidibada u aasno Puntland, oo aynu adkayno Maamulkeena iyo horumarka Dalkeena .

2.      Wax magaradka ka soo horjeeda Maamulka Puntland, iyadoo aan wax lagaarsiin waa in la wacyi geliyo, waxaynu haysanaa Maamul iyo Dal aan Somaliya inteeda kale ka jirin, waana in laga faa’iidaysto Khayraadka Baddeena iyo Xoolaha Illaahay inagu manaystay.

3.      Waxaa nasiib xumo ah magaca wanaagsan iyo sharafta ay u hayaan Koonfurta Somaliya Madaxweynaha Puntland, waxay had iyo jeer isku qoomameeyaan, haddii C/laahi oo kale aan haysan lahayn adduunka wax baanu la qaybsan lahayn “Baadi nimaan lahayn bay ag-joogtaa!!.

4.      Dhibaatada ugu weyn ee maanta nahaysata waxaa weeye dadkii oo dhan ayaa siyaasi noqday kii Xoolo lajoogay kii Magaalo joogayba, Adduun weynaha siyaasiyiintu aad bay ugu yar yihiin siyaasaduna waa Cilmi la barto. Waqtigu waa marxalado badan yahay, mid walba gooni baa loo qorsheeyaa.

Dad baa waxay ku eed-eeyaan Madaxweynaha wuxuu wax ka qabtay Ciidamada oo kaliya, haddii fikrad ka qabi lahaydeen sida ay u habaysan yihiin Koonfurta Somaliya iyo Somaliland saas ma yiraahdeen, talaabadaas uu qaadayna aad iyo aad bay u hagaagsan tahay.

C/laahi Yuusuf waa ninkii keenay, Abuuray, Dhisay Puntland, Bilad Sharaf ayuu mutaystay. Sida uu ciidamada u dhisay ayuu marlabadna u dhisayaa Caaf-imaadka iyo Waxbarashada, waana ogsoon yahay in Dawladda horumarkeedu yahay Caafimaadka iyo Waxbarashada oo la hor mariyo. 

Dalka horumarkiisa uma xilsaarna Madaxweynaha oo kaliya ee nin walba oo Reer Puntland ah xilku waa saaran yahay, kuwa Baararka ama meelaha la fariisto ee hadal bilaa micne ah ku haya waa in ay talo iyo xoogba ku biiriyaan Maamulka, matalan ninkii Gurigiisa Geed ku beera ama dhagax ka qaada wadadda dalka wax buu u qabatay.

5.         Maamul baynu dhisanay, mudo ayaynu u qabanay, iyadoo aan mudadii dhamaan maxaa hadba meel loogu guurayaa, oo loo canbaaraynayaa dad aan istaahilin in la Canbaareeyo , waajib waxaa inagu ah in loo mahad celiyo.

6.        Sicir bararka maanta nahaysta Maamulku wax eed ah kuma laha, sababtu waxa weeye oo eeda iska leh xulufada Carta iyo Ganacsatada Maanta, waxaana ila haboon in aynu ka hortagno Ganacsatada, sida waalan wax u doonaya.

“PUNTLAND WAA DAL SI WALBA ISKU FILAN”.